skip to main navigation

Böl My Sheep By Rhoda Bulter

Böl My Sheep - Rhoda Bulter. A reflection on our compassion for our fellow man.

Read By Rhoda Bulter

Bol My Sheep Bol My Sheep We geng ta da kirk an gie wir alms,
We say wir prayers an we sing wir psalms,
An whin a hoose is blindit an murns a daeth
We veesit da folk an we send a wraeth,
An slip da bairns a penny or twa,
Dan blyde whin wir oot an awa fae it aa.

We coulda dön somethin ta shaa we wir carin
Whin we heard o da lass at wis haein da bairn,
An we mighta steadied dat craiter a bit
At drank himsel silly juist tryin ta forgit,
An sae for da waant o a haand ta clesp
He wis left ta redd oot his ain reffled hesp

We sit at da hertstane an creeticise
Dis een's claes an da nixt een's wyes,
An maskin truth wi a bit a fun
Say 'God be blissed at wir no laek yun',
An rowe in ower da bed content
At anidder day wis nobly spent.

An whin we read o da rivers at ran wi blöd
An da fok at wir sufferin fae aertquake an flöd,
Did we send twartree shilleens ta aese dir state,
Ta help ta git medeecine, shaalter an maet?
Or shak wir heads an say 'Dear a dear,
Loard be praised at it's no laek yun here'?

It's aesy whin snug i wir ain fower waas
Ta wave wir flag an support da caase,
Bit aa ower aften we staand at da brink,
Faert ta spaek oot for whaat neebors wid tink,
An seekin nae pairt in anidder's affairs,
We staand idda shadoos an offer wir prayers:

'O Loard be wi aa dem in trouble dis night,
Send someen ta guide dem an shaa dem a light.
Provide for da poor wi fantation oppressed, 
Ta da seek an da waakrife gie paece an rest.
Send help ta da needy whaarever dey be;
Bit I canna win, sae You needna send me.'

Bit my, whaat a different place dis wid be,
If we aa set wis doon an towt whaat we could gie.
If we didna hae money, gie wir time for a while;
Say twartree kind wirds, mak a man smile.
Or juist ta be dere an patiently listen
Ta somebody's troubles, is truly a blissen.

Dan geng ta da kirk an gie wir alms,
Say wir prayers an sing wir psalms,
An whin we come oot again hae a care
For aa da fok at we didna see dere,
For ta serve wir Maker is ta help een-anidder,
An aye traet da man at we meet laek wir bridder.

back on top